AP Crime : బెంగళూరులో ఓ తెలుగు యువతి దారుణ హత్యకు గురైంది. రూమ్‌లో ఒంటరిగా ఉన్న యువతిని ఒక యువకుడు హత్య చేసినట్లు సమాచారం. అన్నమయ్య జిల్లా, రామసముద్రం మండలం, బిక్కిమానిపల్లి గ్రామానికి చెందిన దేవిశ్రీ (21), బెంగళూరులో ఉంటూ ఓ ప్రైవేట్ కాలేజీలో బీబీఎం చదువుతున్నారు. దేవిశ్రీ తన రూమ్‌లో ఒంటరిగా ఉన్న సమయంలో ప్రేమ్ వర్ధన్ అనే యువకుడు ఆమెపై దాడి చేసి దారుణంగా హత్య చేసినట్లు తెలుస్తోంది.
హత్య చేసిన నిందితుడు ప్రేమ్ వర్ధన్ చిత్తూరు జిల్లా, పుంగనూరు నియోజకవర్గం, చౌడేపల్లి మండలం, పెద్దకొండామారి గ్రామానికి చెందిన వ్యక్తిగా పోలీసులు గుర్తించారు. హత్యకు గల కారణాలు ఇంకా పూర్తిగా తెలియరాలేదు, అయితే ఇది ప్రేమ వ్యవహారానికి సంబంధించిన ఘటనే అయి ఉండవచ్చని పోలీసులు అనుమానిస్తున్నారు.
ఈ దారుణ ఘటనపై కేసు నమోదు చేసుకున్న కర్ణాటకలోని తమ్మినహళ్లి పోలీసులు, నిందితుడు ప్రేమ్ వర్ధన్ కోసం గాలింపు చర్యలు ముమ్మరం చేశారు. తెలుగు ప్రాంతానికి చెందిన యువతి ఇలా దారుణ హత్యకు గురికావడం ఆ ప్రాంతంలో విషాదాన్ని నింపింది. సోమవారం ఉదయం ప్రేమ్ స్నేహితుడు రూమ్‌కి వెళ్లి చూడగా.. దేవిశ్రీ విగతజీవిగా కనిపించింది. దాంతో అతను పోలీసులకు సమాచారమిచ్చాడు.
