TTD : తిరుమల ప్రసాదంపై వ్యాఖ్యలు చేస్తూ ఇటీవల వార్తల్లో నిలిచిన యాంకర్ శివజ్యోతికి టీటీడీ దిమ్మతిరిగే షాకిచ్చింది. భవిష్యత్తులో ఆమె శ్రీవారి దర్శనం చేసుకోకుండా ఉండేందుకు టీటీడీ అధికారులు ఆమె ఆధార్ కార్డును బ్లాక్ చేశారు. ఇటీవల శివజ్యోతి తన భర్త, స్నేహితులతో కలిసి తిరుమల శ్రీవారి దర్శనానికి వెళ్లినప్పుడు, క్యూలైన్‌లో భక్తులకు అందించే అన్న ప్రసాదం గురించి చేసిన వ్యాఖ్యలు తీవ్ర వివాదాస్పదం అయ్యాయి.
“తిరుమలలో కాస్ట్లీ ప్రసాదం అడుక్కుంటున్నాం,” “రిచ్చెస్ట్ బిచ్చగాళ్లం మేమే” అంటూ ఆమె చేసిన కామెంట్లు సోషల్ మీడియాలో వైరల్ అయ్యాయి. దీంతో ఈ వ్యాఖ్యలపై శ్రీవారి భక్తులు, హిందూ సంఘాలు తీవ్ర అభ్యంతరం వ్యక్తం చేస్తూ, ఆమెపై విమర్శలు, ట్రోలింగ్ చేశారు. విమర్శలు తీవ్రం కావడంతో, శివజ్యోతి వెంటనే ఒక వీడియో విడుదల చేసి క్షమాపణలు చెప్పారు.
ఆమె క్షమాపణలు చెప్పినప్పటికీ, ఈ వివాదాన్ని టీటీడీ తీవ్రంగా పరిగణించింది.ఆమె మరోసారి శ్రీవారి దర్శనం చేసుకోకుండా ఆధార్ కార్డును బ్లాక్ చేసింది. కాగా శివజ్యోతి ప్రస్తుతం గర్భవతిగా ఉన్నారు. ఈ విషయాన్ని ఆమె ఇటీవల సోషల్ మీడియా ద్వారా వెల్లడించారు.ఆమె సీమంతం వేడుకలకు సంబంధించిన ఫోటోలు కూడా ఇటీవల వైరల్ అయ్యాయి.
