Pushpaka Vimana : మూకీ సినిమా యుగం ముగిసాక టాకీ సినిమా తరం మొదలయ్యాక మన దేశంలో వచ్చిన డైలాగులు లేని మొట్టమొదటి , చిట్టచివరి సినిమా ఈ పుష్పక విమానమే ఏమో ! ప్రపంచం లోనే రెండవ సినిమా . మొదటిది 1982 లో వచ్చిన అమెరికన్ మూవీ Koyaanisqiatsi . కధ ,స్క్రీన్ ప్లే , దర్శకత్వం , నిర్మాణంలో భాగస్వామ్యం అంతా సింగీతం వారే. సినిమాలో కొన్ని సన్నివేశాల్ని , నటుల్ని ప్రేక్షకులు మరచిపోలేరు . K V రెడ్డి గారి శిష్యరికం ఆ సన్నివేశాల సృష్టిలో తెలిసిపోతుంది . నిరుద్యోగి హీరో ఇచ్చే డబ్బుల్ని బట్టి టీ పోసే కుర్రాడు , ఆ టీలో కాకి లాగా అవీ ఇవీ వేసి గ్లాసుని నిండుగా చేసి గర్వంగా టీని సేవించటం , కమల్ హాసన్- బిచ్చగాడు పి యల్ నారాయణ ధన ప్రదర్శన , ఏంటిక్స్ షాపులో హీరోహీరోయిన్ల సైగలు , హోటలుకి పుష్పక్ అనే పేరు , హోటల్ బాల్కనీల నుండి ప్రేమాయణం , తన గదిలో బంధించబడిన కోటీశ్వరుని మలాన్ని గిఫ్ట్ పేకేట్టుగా చేసి బయట వదిలేయటం వంటి సీన్లను నలభై ఏళ్ళు కావస్తున్నా మరచిపోలేదు .
ఇవన్నీ ఒక ఎత్తు అయితే ఇంకొకటి అమల తండ్రి మేజిక్ షో . ఎంత గొప్పగా దూర్చారో సింగీతం వారు . ఆ మెజీషియన్ పాత్రను వేసిన నటుడి పేరు కె యస్ రమేష్ . అతను నటుడు , నిర్మాత , దర్శకుడు మాత్రమే కాకుండా మెజీషియన్ కూడా . గొప్పగా ఎంపిక చేసుకున్నారు . మరో గొప్ప అంశం పాత్రల రాక , వాటి నిష్క్రమణ . నాటకాలలో ఎలా అయితే ఒక్కో పాత్ర ఎంటరయి , ముగింపుకి ఎలా ఒక్కోటి ఒక్కోటి నిష్క్రమిస్తాయో అలాగే నిష్క్రమిస్తాయి ఇందులో కూడా నిశితంగా పరిశీలిస్తే .సినిమా చూస్తున్నంత సేపు డైలాగులు లేవు అని అనిపించదు . అలాంటి అద్భుతమైన బేక్ గ్రౌండ్ మ్యూజిక్కుని అందించారు యల్ వైద్యనాధన్ . ఆయనకు కర్నాటక రాష్ట్ర ప్రభుత్వం నుండి ఉత్తమ సంగీత దర్శకుడిగా అవార్డు కూడా వచ్చింది ఈ సినిమాకు . ఈనాటి ఢాం ఢాం సంగీత దర్శకులకు ఈ సినిమాని కట్టేసి చూపాలి . అలాగే ఎక్కడా బోరించదు . అంతటి బిర్రయిన స్క్రీన్ ప్లేకి అంతే గొప్ప ఎడిటింగుని అందించారు డి వాసు . ఆయనకు కూడా బెస్ట్ ఎడిటర్ అవార్డు వచ్చింది .
మన వాళ్ళు ఇప్పుడు Pan India సినిమాలని ఓ డబ్బా కొట్టుకుంటూ ఉంటారు . 1987 లోనే ఇది గొప్ప Pan India సినిమా . పలు ప్రాంతాల్లో విడుదల కావటమే కాకుండా పలు భాషల నటీనటులు నటించారు . అమల , బాలీవుడ్ నటులు సమీర్ ఖక్కర్ , టినూ ఆనంద్ , బ్లాక్ బస్టర్ హిందీ ఆరాధన సెకండ్ హీరోయిన్ ఫరీదా జలాల్ , తమిళ నటుడు ప్రతాప్ పోతన్ , కన్నడ నటి రమ్య , తెలుగు నటుడు పి యల్ నారాయణ , ఇలా ఎంతో మంది . హిందీ బెల్టులో పుష్పక్ టైటిలుతో , తమిళనాడులో పెసం పదం టైటిలుతో , కేరళ కర్నాటకలలో పుష్పక విమానం టైటిలుతో విడుదల అయింది . అన్ని ప్రాంతాల్లో ఇప్పటి లాగా ప్రి రిలీజ్ శబ్ద కాలుష్యం , ప్రభుత్వాలతో తగాదాలు , టికెట్ రేట్ల పంచాయతీ వంటి న్యూసెన్స్ లేకుండా మామూలు టికెట్లతో ఢంకా బజాయించింది . మెజీషియన్ కె యస్ రమేష్ నటన అద్భుతం . రకరకాల విన్యాసాలతో భార్యామణిని ఆట పట్టించటం బాగా సరదాగా ఉంటుంది . అమల ముద్దుముద్దుగా నిశ్శబ్ధంగా అందమైన , నాజూకయిన నటనను ప్రదర్శించింది . టినూ ఆనంద్ . అతని నటన ఇందులో , ఆదిత్య 369 లో మనందరం చూసిందే .
కమల్ హాసన్ తర్వాత , బహుశా ధీటుగా , నటించిన నటుడు పి యల్ నారాయణ . హీరోకి తన వద్ద దాచుకున్న డబ్బుని కాస్త కాస్త చూపటం ప్రేక్షకులు మరచిపోరు . అనాధ శవంగా చూసినప్పుడు , మునిసిపాలిటీ వాళ్ళు ఎత్తినప్పుడు చాలా సానుభూతి కలుగుతుంది . దాచుకున్న డబ్బంతా గాలికి , జనానికి పోతుంది . ఓ జీవిత సారాన్ని చూపుతాడు దర్శకుడు . అంతుంది ఇంతుంది అని విర్రవీగే ప్రతి మానవుడు అన్నీ గాలికి వదిలేసి శ్మశానం బండి ఎక్కాల్సిందే అనే శ్మశాన వైరాగ్యాన్ని ప్రవచించారు సింగీతం వారు . మరో పాత్ర ఆ పుష్పక్ హోటల్ అధినేత ఓ చిన్న టీ స్టాల్ స్థాయి నుండి అంత పెద్ద స్టార్ హోటలుకు ఓనర్ ఎలా అయ్యారో రెండు సార్లు చూపుతారు . అతని ఫోటోలే హీరోకి చివర్లో స్ఫూర్తిని కలిగిస్తాయి . కుఛ్ దినోంకా సుల్తాన్ లాగా అనుభవించిన హీరోకి జ్ఞానోదయం కలిగి ఫైవ్ స్టార్ అవతారానికి ముగింపు పలికి తన బతుక్కి మరలి పోతాడు . ఏమీ కాజేయకుండా అన్నీ వదిలేసి పోయిన హీరోని చూసి కోటీశ్వరుడికి కూడా బుధ్ధి వచ్చి భార్యతో కలిసి పోతాడు .
అలా పాత్రలన్నీ నిష్క్రమిస్తాయి . చాలా నాటకీయంగా చూపారు సింగీతం వారు . అమల కూడా వెళ్ళిపోవటం , తాను ఇచ్చిన కాగితం గాలికి పోవటం , వెరశి హీరో మీద కూడా వసంత కోకిల సినిమాలో లాగా కూస్తంత జాలి కలుగుతుంది . అద్భుతమైన పాత్రల సృష్టి .మొత్తం షూటింగ్ బెంగుళూరు లోని ఐటిసి వారి Windsor Manor హోటల్ లోనే జరిగింది . ఈ హోటలుకు నేను 1985/86 ప్రాంతంలో వెళ్ళాను . ఈ హోటలుకి పక్కనే ఓ వీధి సెట్టింగ్ కూడా వేసారట . ఈ సినిమా ఆర్ట్ డైరెక్టర్ తోట తరణిని అభినందించాల్సిందే . సినిమాటోగ్రాఫర్ బి సి గౌరీశంకర్ .
ఈ సినిమాలో ప్రేక్షకులకు భలే మెప్పించే పాత్ర ఆ ఇళ్ళల్లో ఊడ్చే స్వీపర్ పాత్ర . ఆ స్వీపర్ సింగారం , వయ్యారం , వాటిని కరకర తిందామా అన్నట్లు చూసే ముసలోడు , వగైరా . నిజ జీవితంలో చాలామంది తగులుతుంటారు అలా . 12వ IFFI , షాంగై అంతర్జాతీయ ఫిలిం ఫెస్టివల్లో ఈ సినిమా ప్రదర్శించబడింది . ఉత్తమ చిత్రంగా , కమల్ హాసనుకి ఉత్తమ నటుడిగా ఫిలిం ఫేర్ అవార్డులు వచ్చాయి . కర్ణాటక రాష్ట్ర ప్రభుత్వం నుండి సింగీతం వారికి ఉత్తమ దర్శక అవార్డు కూడా వచ్చింది . కీర్తి , ధనం , గుర్తింపు , అన్నీ పుష్కలంగా వచ్చిన ఈ సినిమాకు సింగీతం వారి సహ నిర్మాత పేరు నాగరాజు . ఆయన మరి ఏ సినిమాను తీయలేదట .
Credit : Subramanyam Dogiparthi
