Induction stove : గ్యాస్ ధరలు పెరుగుతున్న తరుణంలో చాలామంది ప్రత్యామ్నాయంగా ఇండక్షన్ స్టవ్ల వైపు మొగ్గు చూపుతున్నారు. ఇవి వంటను వేగంగా పూర్తి చేయడమే కాకుండా పర్యావరణానికి కూడా మేలు చేస్తాయి. అయితే, వీటిని వాడేటప్పుడు కొన్ని చిన్నపాటి జాగ్రత్తలు పాటించకపోతే ఇబ్బందులు తప్పవని నిపుణులు హెచ్చరిస్తున్నారు.
ఇండక్షన్ స్టవ్ అయస్కాంత శక్తి ఆధారంగా పనిచేస్తుంది కాబట్టి, దీనిపై అన్ని రకాల గిన్నెలు సెట్ కావు. కేవలం ఇనుము లేదా స్టీల్ పాత్రలను మాత్రమే వాడాలి. ముఖ్యంగా గిన్నె అడుగు భాగం సమానంగా (flat) ఉండాలి. రాగి, అల్యూమినియం, గాజు లేదా మట్టి పాత్రలు ఈ స్టవ్పై అస్సలు పనిచేయవు.
స్టవ్ కోసం నాణ్యమైన సాకెట్, ప్లగ్ పాయింట్ను వాడటం వల్ల విద్యుత్ ఆదా అవుతుంది. స్టవ్ పైన ఉండే కంట్రోల్ ప్యానెల్పై నీళ్లు పడకుండా చూసుకోవాలి. వంట మొదలుపెట్టే ముందు గిన్నెను స్టవ్ మీద ఉంచిన తర్వాతే స్విచ్ ఆన్ చేయాలి. మొదట తక్కువ వేడితో మొదలుపెట్టి, అవసరాన్ని బట్టి పెంచుకోవడం మంచిది. ఇండక్షన్ స్టవ్ లోపల వేడిని తగ్గించడానికి ఒక ఫ్యాన్ ఉంటుంది.
ఈ ఫ్యాన్ తిరిగేటప్పుడు దానికి అడ్డంగా ఏ వస్తువులూ పెట్టకూడదు. వంట పూర్తయి స్టవ్ ఆఫ్ చేసినా, లోపల ఫ్యాన్ ఇంకా తిరుగుతూనే ఉంటుంది. అది పూర్తిగా ఆగిపోయే వరకు ప్లగ్ తీయకూడదు. అప్పుడే స్టవ్ ఎక్కువ కాలం మన్నికగా ఉంటుంది.
స్టవ్ పైభాగం గ్లాస్తో ఉంటుంది కాబట్టి గిన్నెలు పెట్టేటప్పుడు, దించేటప్పుడు జాగ్రత్తగా ఉండాలి. వంట పూర్తయిన వెంటనే వేడిగా ఉన్నప్పుడు స్టవ్ను తుడవకూడదు. అది పూర్తిగా చల్లారిన తర్వాతే మెత్తని గుడ్డతో శుభ్రం చేయాలి. ఈ చిన్నపాటి మెలకువలు పాటిస్తే మీ ఇండక్షన్ స్టవ్ సురక్షితంగా ఉండటమే కాకుండా మీ వంట కూడా సాఫీగా సాగుతుంది.
