Jaahnavi Kandula : అమెరికాలోని సీటెల్ నగరంలో పోలీసు వాహనం ఢీకొని మరణించిన భారతీయ విద్యార్థిని జాహ్నవి కందుల( Jaahnavi Kandula) కుటుంబానికి దాదాపు 260 కోట్ల రూపాయల (29 మిలియన్ డాలర్లు) పరిహారం ఇచ్చేందుకు అక్కడి ప్రభుత్వం అంగీకరించింది. ఈ విషయాన్ని ఆ నగరం తరపున లాయర్లు అధికారికంగా ప్రకటించారు. ఈ డబ్బంతా కేవలం పరిహారం మాత్రమేనని, జాహ్నవి ప్రాణానికి ఇది వెల కాదని చెబుతూనే, ఆమె కుటుంబానికి ఇది కొంతలో కొంత ఉపశమనం కలిగిస్తుందని నగరం తరపున ప్రతినిధులు ఆశాభావం వ్యక్తం చేశారు.
ఈ దారుణం 2023 జనవరిలో జరిగింది. అప్పట్లో జాహ్నవి రోడ్డు దాటుతుండగా, ఒక అత్యవసర కాల్కు స్పందించి వేగంగా వెళ్తున్న పోలీసు అధికారి కెవిన్ దేవ్ ఆమెను ఢీకొట్టాడు. ఆ సమయంలో కారు వేగం గంటకు 119 కిలోమీటర్లుగా ఉంది. ఈ ప్రమాదంలో ఆమె తీవ్రంగా గాయపడి మరణించారు.
Seattle City Administration agrees to pay $29 million (~₹241 crore) to the family of Indian student Jaahnavi Kandula, who lost her life after being hit by a speeding Seattle police vehicle.
Justice may be late, but her life mattered. 🇮🇳🇺🇸 pic.twitter.com/YWrWXF6kLv— RB. (@rahul4bisht) February 12, 2026
అయితే, ఈ ఘటన తర్వాత మరో పోలీసు అధికారి డానియల్ ఆడెరర్ చేసిన వ్యాఖ్యలు ప్రపంచవ్యాప్తంగా ఆగ్రహానికి కారణమయ్యాయి. బాడీ కెమెరాలో రికార్డైన ఆ వీడియోలో, అతడు నవ్వుతూ “ఆమె ప్రాణానికి అంత విలువ లేదు, కేవలం ఒక చెక్కు రాసి ఇచ్చేస్తే సరిపోతుంది” అనే అర్థం వచ్చేలా మాట్లాడటం తీవ్ర చర్చకు దారితీసింది.
ఈ వ్యాఖ్యల వల్ల పోలీసు శాఖ పరువు పోయిందని భావించిన అక్కడి ఉన్నతాధికారులు ఆ అధికారిని వెంటనే ఉద్యోగం నుండి తొలగించారు. జాహ్నవి మరణం పట్ల సానుభూతి వ్యక్తం చేస్తూ, ఆమె చదువుకున్న నార్త్ ఈస్టర్న్ యూనివర్సిటీ ఆమెకు గౌరవపూర్వకంగా మాస్టర్స్ డిగ్రీని కూడా అందజేసింది. ప్రస్తుతం ఈ భారీ పరిహారం ద్వారా ఈ కేసు ఒక ముగింపునకు చేరుకుంది.
