pregnant woman : కుటుంబ కలహాలు, వేధింపులు ఒక నిండు ప్రాణాన్ని, ఇంకా పుట్టని మరో జీవిని బలితీసుకున్నాయి. కర్ణాటకలోని రామనగర జిల్లా వడ్డరదొడ్డి గ్రామంలో 19 ఏళ్ల గర్భిణి ఆత్మహత్య చేసుకోవడం స్థానికంగా తీవ్ర కలకలం రేపింది. కేవలం తొమ్మిది నెలల క్రితమే వివాహమైన నయన (19), ఐదు నెలల గర్భిణిగా ఉన్న సమయంలోనే ఈ అఘాయిత్యానికి ఒడిగట్టింది.
కుటుంబ సభ్యులు తెలిపిన వివరాల ప్రకారం.. నయన తన ఇంట్లో ఒంటిపై డీజిల్ పోసుకుని నిప్పు అంటించుకుంది. మంటలు తీవ్రంగా వ్యాపించడంతో సహాయం అందేలోపే ఆమె అక్కడికక్కడే ప్రాణాలు కోల్పోయింది. నయనతో పాటు ఆమె కడుపులోని బిడ్డ కూడా మరణించడంతో ఆ కుటుంబంలో తీరని విషాదం నెలకొంది. పెళ్లయినప్పటి నుండి భర్త సునీల్, అతని తల్లిదండ్రులు నయనను మానసికంగా వేధిస్తున్నారని మృతురాలి తల్లిదండ్రులు ఆరోపిస్తున్నారు.
గత కొన్ని నెలలుగా భర్త ఇంట్లో గొడవలు, వేధింపులు మితిమీరిపోయాయని, ఆ ఒత్తిడిని భరించలేకే నయన ఇంతటి కఠిన నిర్ణయం తీసుకుందని వారు వాపోతున్నారు. తమ కుమార్తె మరణానికి భర్త, అత్తమామలే నేరుగా బాధ్యులని, వారిపై కఠిన చట్టపరమైన చర్యలు తీసుకోవాలని డిమాండ్ చేస్తూ రామనగర రూరల్ పోలీసులకు ఫిర్యాదు చేశారు.
సమాచారం అందుకున్న పోలీసులు ఘటనా స్థలానికి చేరుకుని మృతదేహాన్ని పోస్టుమార్టం నిమిత్తం జిల్లా ఆసుపత్రికి తరలించారు. తల్లిదండ్రుల ఫిర్యాదు మేరకు కేసు నమోదు చేసిన పోలీసులు, ప్రస్తుతం భర్త సునీల్తో పాటు అతని తల్లిదండ్రులను విచారిస్తున్నారు. అన్ని కోణాల్లో దర్యాప్తు జరిపి బాధ్యులకు శిక్ష పడేలా చేస్తామని పోలీసులు వెల్లడించారు. ఈ ఘటన ఆ గ్రామంలో పెను విషాదాన్ని నింపింది.
