Personal Finance Tips : మీరు సంపాదించే డబ్బు మిమ్మల్ని ధనవంతుడిని చేయదు, మీరు ఆదా చేసే డబ్బే మిమ్మల్ని ధనవంతుడిని చేస్తుంది… ఇది గుర్తుపెట్టుకోండి!
ప్రస్తుత కాలంలో పెరుగుతున్న ధరలు వల్ల సామాన్యుడికి పొదుపు అనేది ఒక సవాలుగా మారింది. నెలాఖరు వచ్చేసరికి చేతిలో చిల్లిగవ్వ లేక ఇబ్బంది పడే పరిస్థితి నుండి బయటపడాలంటే కేవలం సంపాదన పెంచుకుంటే సరిపోదు, ఖర్చులను కంట్రోల్ చేయడం కూడా అంతే ముఖ్యం. ఆర్థిక నిపుణుల అభిప్రాయం ప్రకారం.. ఒక వ్యక్తి తన ఆదాయాన్ని సమర్థవంతంగా నిర్వహించుకోవడానికి ముందుగా ఒక పక్కా ప్రణాళికను సిద్ధం చేసుకోవాలి. ఇందుకోసం ప్రపంచవ్యాప్తంగా ప్రాచుర్యం పొందిన 50/30/20 సూత్రాన్ని పాటించడం ఎంతో మేలు చేస్తుంది. అంటే మీ సంపాదనలో 50 శాతం ప్రాథమిక అవసరాలకు, 30 శాతం వ్యక్తిగత కోరికలకు, కనీసం 20 శాతం భవిష్యత్తు అవసరాల కోసం పొదుపు చేయాల్సి ఉంటుంది.
ఖర్చులను తగ్గించుకోవడంలో అత్యంత కీలకమైన అంశం ఎంటంటే అవసరం,కోరిక మధ్య ఉన్న వ్యత్యాసాన్ని గుర్తించడం. చాలా మంది ఇతరులను చూసి అనవసరమైన వస్తువులను కొనుగోలు చేస్తుంటారు. ఏదైనా వస్తువు కొనే ముందు అది మీకు నిజంగా అవసరమా లేదా అనే ప్రశ్న వేసుకోవడం ద్వారా వృధా ఖర్చులను తగ్గించవచ్చు. అలాగే, ప్రతి నెలా మనం చేసే చిన్న చిన్న ఖర్చులను ఇలా ట్రాక్ చేయడం వల్ల డబ్బు ఎక్కడ వృధా అవుతుందో సులభంగా అర్థమవుతుంది.
మరో ప్రధానమైన ఖర్చు డిజిటల్ సబ్స్క్రిప్షన్ల రూపంలో ఉంటుంది. మనం తరచుగా వాడని ఓటిటి ప్లాట్ఫారమ్లు, మ్యాగజైన్లు లేదా యాప్ సబ్స్క్రిప్షన్లు మనకు తెలియకుండానే బ్యాంక్ బ్యాలెన్స్ను తగ్గిస్తుంటాయి. వీటిని ఎప్పటికప్పుడు సమీక్షించుకుని రద్దు చేసుకోవడం ఉత్తమం. అలాగే క్రెడిట్ కార్డుల వినియోగం విషయంలో అత్యంత జాగ్రత్తగా ఉండాలి. కార్డు ఉంది కదా అని షాపింగ్ చేయడం వల్ల భారీ వడ్డీల ఊబిలో చిక్కుకునే ప్రమాదం ఉంది. క్రెడిట్ కార్డును కేవలం అత్యవసర పరిస్థితుల్లో లేదా పాయింట్లు, క్యాష్బ్యాక్ వచ్చే పనులకు మాత్రమే వాడుతూ, నెలనెలా పూర్తి బిల్లును చెల్లించడం మంచిది.
కిరాణా సామాగ్రి కొనే ముందు ఒక జాబితాను సిద్ధం చేసుకోవడం వల్ల అనవసర వస్తువులపై ఖర్చు తగ్గుతుంది. బయట భోజనాలు చేయడం తగ్గించి, ఇంటి భోజనానికి ప్రాధాన్యత ఇవ్వడం వల్ల ఆరోగ్యం మెరుగుపడటమే కాకుండా నెలకు వేల రూపాయలు ఆదా అవుతాయి. పొదుపు అనేది ఒక రోజులో వచ్చే మార్పు కాదు, ఇది నిరంతర ప్రక్రియ. నేటి చిన్న పొదుపులే రేపటి భారీ పెట్టుబడులకు పునాది అవుతాయని ప్రతి ఒక్కరూ గుర్తుంచుకోవాలి.
నెలకు రూ. 10 వేలు ఆదా చేయాలంటే, ప్రతిరోజూ కనీసం రూ. 330 ఆదా చేయాలనే లక్ష్యాన్ని పెట్టుకోండి. ఉదాహరణకు, వారానికి రెండు సార్లు బయట తినడం మానేస్తేనే నెలకు సుమారు రూ. 3,000 నుండి రూ. 4,000 వరకు ఆదా అవుతుంది. ముందు ఖర్చు చేసి తర్వాత మిగిలినది దాచుకోవడం కాకుండా ముందు పొదుపు మొత్తాన్ని పక్కన పెట్టి, మిగిలిన డబ్బుతోనే నెల గడపడం అలవాటు చేసుకోవాలి. జీతం పడగానే ఒక ఫిక్స్డ్ డిపాజిట్ (FD) లేదా రికరింగ్ డిపాజిట్ (RD) రూపంలో రూ. 5,000 ఆటోమేటిక్గా కట్ అయ్యేలా ప్లాన్ చేసుకోండి.
