IT ఉద్యోగం అనే ఓ కల… రూ. 3 లక్షల ఖరీదు చేసింది! ప్రముఖ కంపెనీల పేరు చెప్పి వేసిన వలలో 400 మంది నిరుద్యోగులు బలయ్యారు. ఇప్పుడు రూ. 3 లక్షలు, భవిష్యత్తు రెండూ పోయాయి. మాదాపూర్‌లో 400 మంది యువతను నిండా ముంచిన NSN ఇన్ఫోటెక్ ఘరానా మోసం ఉదాంతం ఇది.
హైదరాబాద్ లో మరో ఘరనా మోసం వెలుగులోకి వచ్చింది ఐటీ ఉద్యోగులను టార్గెట్ చేసి ఒక్కరు కాదు ఇద్దరు కాదు ఏకంగా 400 మందిని మోసం చేసి లక్షల్లో దోచేశారు. మాదాపూర్‌లో నడుస్తున్న ‘ఎన్ఎస్ఎన్ ఇన్ఫోటెక్ (NSN Infotech)’ అనే సంస్థ ఈ భారీ మోసానికి పాల్పడింది. పెద్ద పెద్ద కంపెనీల్లో ఉద్యోగాలు ఇప్పిస్తామంటూ ముందుగా నమ్మించారు. ట్రైనింగ్ పేరుతో లక్షల్లో డబ్బులు వసూలు చేసిన కంపెనీ అధినేత స్వామి నాయుడు అకస్మాత్తుగా జంప్ అయ్యాడు.
టాప్ కంపెనీలో జాబ్ అనేసరికి ఆశతో ఉద్యోగం పొందాలనే తపనతో ఉన్న నిరుద్యోగులు NSN ఇన్ఫోటెక్ లో ఒక్కో అభ్యర్థి నుంచి ఏకంగా రూ.3 లక్షలు కట్టారు. మొత్తం 400 మంది నుంచి కోట్లాది రూపాయలు పోగేసిన తర్వాత, సంస్థ అధినేత స్వామి నాయుడు ఎంచక్కా చెక్కెశాడు. డబ్బు కట్టి, ఉద్యోగం కోసం ఎదురుచూస్తున్న బాధితులు ఇప్పుడు కంపెనీ ఆఫీసు మూసి ఉండటాన్ని చూసి లబోదిబోమంటున్నారు. తాము ఘోరంగా మోసపోయామని గ్రహించిన నిరుద్యోగులు పెద్ద సంఖ్యలో పోలీసులను ఆశ్రయించారు.
ఈ మోసంపై బాధితుల ఫిర్యాదు మేరకు పోలీసులు కేసు నమోదు చేసుకున్నారు. భారీ మొత్తంలో డబ్బు వసూలు చేసి పరారైన నిందితుడు స్వామి నాయుడు కోసం ప్రత్యేక బృందాలతో గాలింపు చర్యలు చేపట్టినట్లు సమాచారం. నిరుద్యోగులు ఇలాంటి నకిలీ ఆఫర్ల పట్ల అప్రమత్తంగా ఉండాలని పోలీసులు సూచించారు. ఈ రోజుల్లో మోసం చేసేవాడి కంటే మోసపోయేవాడిదే తప్పే.. సమాజంంలో ఇలాంటివి రోజుకోకటి జరుగుతూనే ఉన్నాయి. చాలా జాగ్రత్తగా ఉండటం మన బాధ్యత.
