Period Pain : చాలామంది ఆడవారికి పీరియడ్స్ వచ్చిన మొదటి రోజు నరకంలా అనిపిస్తుంది. కడుపునొప్పి, నడుము నొప్పి, వికారం, నీరసం వంటివి చుట్టుముట్టేస్తాయి. దీనివల్ల కాలేజీలకు, ఆఫీసులకు వెళ్లలేక ఇంట్లోనే పడుకోవాల్సి వస్తుంది. అసలు మొదటి రోజే ఈ నొప్పి(Period Pain) ఎందుకు ఇంత ఎక్కువగా ఉంటుందో ఇప్పుడు తెలుసుకుందాం.
మన శరీరంలో ప్రోస్టాగ్లాండిన్స్ అనే కొన్ని కెమికల్స్ ఉంటాయి. పీరియడ్స్ మొదలయ్యే ముందు ఇవి మన గర్భాశయంలో ఎక్కువగా తయారవుతాయి. గర్భాశయం లోపల పేరుకుపోయిన రక్తాన్ని బయటకు పంపడానికి ఇవి గర్భాశయాన్ని గట్టిగా పిండినట్లు చేస్తాయి. ఈ కెమికల్స్ మన ఒంట్లో ఎంత ఎక్కువగా ఉంటే, కడుపునొప్పి అంత తీవ్రంగా ఉంటుంది.
గర్భాశయం అలా గట్టిగా ముడుచుకోవడం వల్ల అక్కడి రక్తనాళాలు నొక్కుకుపోతాయి. దానివల్ల కండరాలకు రక్తం, ఆక్సిజన్ సరిగ్గా అందక విపరీతమైన నొప్పి పుడుతుంది. రక్తస్రావం మొదలైన మొదటి 24 గంటల్లో ఈ కెమికల్స్ ప్రభావం చాలా ఎక్కువగా ఉంటుంది. అందుకే రెండో రోజు లేదా మూడో రోజు వచ్చేసరికి ఈ కెమికల్స్ తగ్గి, నొప్పి కూడా మెల్లగా తగ్గిపోతుంది.
పొత్తికడుపు మీద వేడి నీళ్ల బ్యాగుతో
నొప్పిని తగ్గించుకోవడానికి కొన్ని చిన్న చిట్కాలు బాగా పనిచేస్తాయి. పొత్తికడుపు మీద వేడి నీళ్ల బ్యాగుతో కాపడం పెట్టుకుంటే కండరాలు ఫ్రీ అయ్యి నొప్పి తగ్గుతుంది. అలాగే, అస్సలు కదలలేము అనిపించినా.. మెల్లగా అటు ఇటు నడవడం లేదా చిన్నపాటి వ్యాయామాలు చేస్తే శరీరంలో నొప్పిని తగ్గించే మంచి హార్మోన్లు విడుదలవుతాయి. డాక్టర్ల సలహాతో నొప్పి తగ్గించే మందులు వాడితే అవి గర్భాశయంలో ఆ కెమికల్స్ తయారవ్వకుండా ఆపుతాయి. మంచి నిద్ర, ఒత్తిడి లేకపోవడం కూడా నొప్పిని భరించే శక్తిని ఇస్తాయి.
అయితే, ఒక విషయం గుర్తుంచుకోవాలి. పీరియడ్స్ సమయంలో కొంచెం నొప్పి రావడం సహజమే. కానీ, ఆ నొప్పి భరించలేనంతగా ఉండి, మీరు కనీసం మంచం మీద నుంచి లేవలేని పరిస్థితి ఉంటే మాత్రం వెంటనే డాక్టరును కలవాలి. ఎందుకంటే అది గర్భాశయానికి సంబంధించిన వేరే ఏదైనా సమస్య వల్ల కూడా ఉండవచ్చు. పీరియడ్స్ నొప్పిని ప్రతి నెలా భరిస్తూనే ఉండాలని లేదు, సరైన జాగ్రత్తలు తీసుకుంటే ఆ రోజులను హాయిగా గడపవచ్చు.
