SC : అనుకున్నదొక్కటి అయినది ఒక్కటి బోల్తా కొట్టిందిలే బుల్ బుల్ పిట్ట అని ఓ సాంగ్ గుర్తింది కదా.. సరిగ్గా ఈ పాట ఈయనకు బాగా సరిపోద్దీ. కరీంనగర్ జిల్లా గంగాధర మండలం నాగిరెడ్డిపూర్ గ్రామానికి చెందిన ఇతని పేరు ముచ్చె శంకర్. పాలిటిక్స్ అంటే చాలా ఇంట్రెస్ట్ .. చాలా కాలంగా గ్రామ సర్పంచ్ అవ్వాలనే కోరిక కూడా ఉంది. నాయకత్వ లక్షణాలు కూడా ఉన్నాయి.
ఊరిలో కూడా మంచి పేరు ఉంది. ఇంకేముంది తానే తరువాత సర్పంచ్ అనుకున్నాడు. అన్ని మనం అనుకున్నట్లు జరిగితే అది జీవితం ఎందుకు అవుతుంది కదా.. ఊరిలో రిజర్వేషన్ కలిసి రాలేదు. ఈసారి ఎస్సీ మహిళకు రిజర్వ్ అయింది. దీంతో తాను ఎస్సీ మహిళను పెళ్లి చేసుకుంటే ఆమెను సర్పంచ్ ని చేసి తాను గ్రామంలో చక్రం తిప్పవచ్చు అని భావించాడు.
గత మంగళవారం ఎన్నికల షెడ్యూలు రాగా.. బుధవారం ఆలయంలో నల్గొండ జిల్లాకు చెందిన ఓ ఎస్సీ మహిళను చూసి హడావుడిగా పెళ్లి చేసుకున్నాడు. ఇక ఆమె ఇక తన భార్య సర్పంచి ఐపోయినట్లే అని ఫిక్స్ అయ్యాడు.అన్ని చేశాడు కానీ ఆ ఒక్కటి మరిచిపోయాడు. అదేంటంటే.. ఎన్నికల్లో పోటీ చేయాలంటే ఆ గ్రామ ఓటరు లిస్టులో కచ్చితంగా పేరుండాలి.
కానీ తన భార్య పేరు ఓటరు జాబితాలో చేర్పించడం మరిచిపోయాడు. ఈ క్రమంలో నోటిఫికేషన్ కూడా వచ్చేసింది. పెళ్లి సర్టిఫికేట్ చేతిలో ఉన్నా… ఆమెకి ఓటర్ లిస్ట్‌లో పేరే లేకపోవడంతో నామినేషన్ వేయలేని పరిస్థితి ఏర్పడింది. ఆదర్శ వివాహం చేసుకుని ఊరిలో మంచిపేరైతే సంపాదించుకున్న శంకర్ కు మరో ఐదేళ్ల పాటు సర్పంచ్ కావాలనే కల మాత్రం అలాగే ఉండిపోయింది.
నువ్వు నాకు నచ్చావ్ సినిమాలో వెంకటేష్ కలెక్టర్ కాలేకపోయాడు కానీ.. శంకర్ మాత్రం ఏదో రోజు సర్పంచ్ అవుతాడని ఆశిద్దాం.
