Telangana : మరికొన్ని రోజుల్లో సర్పంచ్ ఎన్నికలు జరగబోతున్న తరుణంలో రంగారెడ్డి జిల్లాకు చెందిన ఓ మాజీ సర్పంచ్ చేసిన వ్యాఖ్యలు ప్రస్తుతం సోషల్ మీడియాలో కలకలం సృష్టిస్తున్నాయి. సర్పంచ్‌గా పోటీ చేయాలనుకునే ఆశావహులకు మాజీ సర్పంచ్ కట్న రాజు ఇచ్చిన తీవ్రమైన హెచ్చరిక వీడియో ఇప్పుడు సోషల్ మీడియాలో వైరల్‌గా మారింది.
బుద్ధి ఉంటే పోటీ చేయొద్దు.. మాజీ సర్పంచ్ ఆవేదన
తొలి విడత సర్పంచ్ ఎన్నికలకు నామినేషన్ల గడువు నేటితో ముగియనుంది. రూ.10 లక్షలతో ఏకగ్రీవం చేసేందుకు ప్రయత్నాలు కూడా జరుగుతున్నాయి. ఇలాంటి తరుణంలో రంగారెడ్డి జిల్లా మక్తగూడ మాజీ సర్పంచ్ కట్న రాజు చేసిన వ్యాఖ్యలు అభ్యర్థులను కంగారు… pic.twitter.com/G4PHBVEZeA
— ChotaNews App (@ChotaNewsApp) November 29, 2025
రంగారెడ్డి జిల్లాలోని మక్తగూడ సర్పంచ్‌గా పనిచేసిన కట్న రాజు, తన పదవీ అనుభవాల నేపథ్యంలో తీవ్ర ఆవేదన వ్యక్తం చేశారు. సర్పంచ్‌గా పోటీ చేయడానికి సిద్ధమవుతున్న వారికి దండం పెడుతూ, కాళ్లు మొక్కుతూ ఒక వీడియో సందేశాన్ని విడుదల చేశారు.
“సర్పంచ్‌గా పోటీ చేయకండి… దయచేసి అప్పుల పాలు అవ్వకండి. నా అనుభవం చెబుతోంది, బుద్ధి ఉంటే సర్పంచ్‌గా పోటీ చేయొద్దు.” అని ఆయన తన వీడియోలో తెలిపారు. . సర్పంచ్‌గా గెలిచిన తర్వాత అభివృద్ధి పనులు చేపట్టడానికి ప్రభుత్వం నుంచి నిధులు సమయానికి రాకపోవడం.. బిల్లుల చెల్లింపులో జాప్యం జరగడం వంటి కారణాల వల్ల చాలా మంది సర్పంచ్‌లు వ్యక్తిగతంగా అప్పులు చేయాల్సి రావడం వంటి అంశాల నేపథ్యంలో రాజు చేసిన ఈ వీడియో వైరల్ గా మారింది.
మరోవైపు తొలి విడత పంచాయతీ ఎన్నికల నామినేషన్ల స్వీకరణ ప్రక్రియ నేటి సాయంత్రంతో ముగియనుంది. దాఖలైన పత్రాల పరిశీలన రేపు (నవంబర్ 30, ఆదివారం) జరుగుతుంది. ఈ దశలో అర్హత లేని లేదా అసంపూర్తిగా ఉన్న నామినేషన్లను అధికారులు తిరస్కరిస్తారు. తుది జాబితా విడుదలైన వెంటనే, అభ్యర్థులకు ఎన్నికల గుర్తులను కేటాయిస్తారు.
