Telangana : స్థానిక సంస్థల ఎన్నికల్లో ఏకగ్రీవాల కోసం గ్రామాల్లో జరుగుతున్న అక్రమ వేలంపాటలు ఇప్పుడు వివాదాస్పదంగా మారుతున్నాయి. తాజాగా మహబూబ్‌నగర్ జిల్లాలో సర్పంచ్ పదవిని ఏకంగా కోటి రూపాయలకు వేలం వేసిన ఘటన వెలుగులోకి వచ్చింది. టంకర అనే ఓ గ్రామంలో సర్పంచ్ పదవికి స్థానికంగా వేలం నిర్వహించారు. హైదరాబాద్‌లో వ్యాపారం చేసే స్థానిక వ్యక్తి రూ. కోటి వేలం పాడి సర్పంచ్ పదవిని దక్కించుకున్నారు.
వేలం ద్వారా వచ్చిన ఈ నిధులను గ్రామంలోని శ్రీ ఆంజనేయ స్వామి ఆలయ నిర్మాణానికి, అభివృద్ధి పనులకు ఖర్చు చేస్తామని గ్రామ పెద్దలు, సదరు వ్యాపారి మధ్య ఒప్పందం కుదిరినట్లు సమాచారం. ఈ ఘటనపై ఈసీ సీరియస్ అయింది. రాష్ట్రంలోని చాలా గ్రామాల్లో ఇలాగే వేలం పాడి సర్పంచ్ పదవులను కొనుగోలు చేస్తుండటం, ఏకగ్రీవాల కోసం ఆశావహులను బెదిరించి బలవంతంగా నామినేషన్లు విత్‌డ్రా చేయిస్తున్నారనే వార్తలపై ఈసీ సీరియస్‌గా స్పందించింది.
జిల్లాల్లో జరుగుతున్న ఏకగ్రీవాలు, వేలంపాటలను ప్రత్యేకంగా పర్యవేక్షించడానికి ఎన్నికల సంఘం స్పెషల్ మానిటరింగ్ సెల్‌ ను ఏర్పాటు చేసింది. ఎన్నికల్లో వేలం పాడినా, లేదా బలవంతంగా నామినేషన్లు విత్‌డ్రా చేయించినా అటువంటి వారిపై కఠిన చర్యలు తీసుకోవాలని ఆదేశించింది. వేలం లేదా బెదిరింపుల ద్వారా నిబంధనలు అతిక్రమించినట్లు తేలితే, ఆయా గ్రామాల్లో ఎన్నికల ప్రక్రియను రద్దు చేయాలని ఈసీ జిల్లా అధికారులను ఆదేశించింది.
సర్పంచ్ పదవి కోసం లక్షలు, కోట్లు వెచ్చించి వేలం పాడటం ప్రజాస్వామ్య స్ఫూర్తికి విరుద్ధమని, ఇలాంటి చర్యలను అరికట్టడానికి కఠిన నిఘా ఉంచామని ఎన్నికల సంఘం స్పష్టం చేసింది.
