Nizamabad : శ్రీకాంత్. రాశి హీరోహీరోయిన్లుగా వచ్చిన ‘ప్రేయసిరావే’ సినిమా గుర్తుందా.. అందులో వీరిద్దరూ ప్రేమించుకుంటారు. హీరో శ్రీకాంత్ దుబాయ్ కు వెళ్లగా.. రాశి తండ్రి మాత్రం సైలెంట్ గా శ్రీకాంత్ కు తెలియకుండా రాశికి మరో వ్యక్తితో పెళ్లి చేస్తాడు. దుబాయ్ నుంచి వచ్చిన శ్రీకాంత్ కు ఈ విషయం తెలిసి షాక్ అవుతాడు.. సరిగ్గా ఇలాంటిదే ఇక్కడ కూడా జరిగింది.
https://twitter.com/TeluguScribe/status/1994296173386170748
తాను ప్రేమించిన యువతిని పెళ్లి చేసుకోవాలనే ఆశతో విదేశాల నుంచి వచ్చిన ఓ యువకుడు, ఆమెకు వేరే వ్యక్తితో వివాహం జరగడంతో తీవ్ర మనస్తాపానికి గురై ఆత్మహత్యకు పాల్పడ్డాడు. ఈ విషాద ఘటన నిజామాబాద్ జిల్లా మోర్తాడ్ మండలం దోమచంద గ్రామంలో చోటుచేసుకుంది.
దోమచంద గ్రామానికి చెందిన శ్రీకాంత్ రెడ్డి, అదే గ్రామానికి చెందిన అఖిల అనే యువతి ఆరేళ్లుగా ప్రేమించుకుంటున్నారు.శ్రీకాంత్ రెడ్డి లండన్ వెళ్లి అక్కడే ఉద్యోగం చేస్తున్నాడు. తిరిగి వచ్చి అఖిలను పెళ్లి చేసుకుందామని భావించాడు. శ్రీకాంత్ లండన్ నుండి తిరిగి వచ్చేసరికి అఖిల తండ్రి ఆమెకు వేరే యువకుడితో వివాహం జరిపించాడు.
తాను నమ్ముకున్న యువతిని ఆమె తండ్రి మరొకరికి ఇచ్చి పెళ్లి చేయడంతో శ్రీకాంత్ రెడ్డి తీవ్ర మనస్తాపానికి గురయ్యాడు. ఈ మనోవేదనను తట్టుకోలేకపోయిన శ్రీకాంత్ రెడ్డి, పురుగుల మందు తాగి ఆత్మహత్యాయత్నం చేశాడు. వెంటనే అతడిని ఆసుపత్రికి తరలించినా, చికిత్స పొందుతూ మృతి చెందాడు. శ్రీకాంత్ రెడ్డి మరణంతో అతని కుటుంబ సభ్యులు, బంధువులు తీవ్ర ఆగ్రహం, ఆవేదన వ్యక్తం చేశారు.
