Natural Pregnancy : నేటి కాలంలో పెళ్లి తర్వాత ప్రతి జంటను వేధిస్తున్న అతిపెద్ద సమస్య ‘సంతానలేమి’. పరిస్థితి ఎలా ఉందంటే, ప్రతి పది జంటలలో ఐదుగురు ఈ సమస్యతో హాస్పిటల్స్ చుట్టూ తిరుగుతున్నారు. ఈ బలహీనతను ఆసరాగా చేసుకుని గల్లీకో ఫెర్టిలిటీ సెంటర్ (Fertility Centers) వెలుస్తోంది. టెస్టులని, ఇంజెక్షన్లని లక్షల రూపాయలు వసూలు చేస్తున్నా, చాలామందికి నిరాశే ఎదురవుతోంది. అయితే, పిల్లలు కలగకపోవడానికి కేవలం అదృష్టం లేకపోవడమో లేదా ఏదో పెద్ద జబ్బో కారణం కాదు.. మన మారిన జీవనశైలే దీనికి అసలు శత్రువు అని నిపుణులు హెచ్చరిస్తున్నారు.
ఒకప్పుడు సంతానలేమి అంటే కేవలం మహిళలదే సమస్య అనుకునేవారు, కానీ ఇప్పుడు 50 శాతానికి పైగా పురుషులలోనే లోపాలు ఉంటున్నాయి. వీర్యకణాల సంఖ్య తగ్గడమే కాకుండా, వాటిలో DNA Fragmentation (డిఎన్ఏ దెబ్బతినడం) అనే తీవ్రమైన సమస్య పెరుగుతోంది. మనం వాడే ప్లాస్టిక్ బాటిల్స్, ఒడిలో పెట్టుకునే ల్యాప్టాప్స్, జేబులో ఉంచుకునే స్మార్ట్ఫోన్ల రేడియేషన్ వల్ల పురుష బీజకణాలు నాశనమవుతున్నాయి. దీనికి తోడు జంక్ ఫుడ్, నిద్రలేమి, విపరీతమైన ఒత్తిడి వల్ల హార్మోన్ల వ్యవస్థ చిన్నాభిన్నమవుతోంది.
నిజానికి, మన శరీరంలో కొత్త వీర్యకణాలు తయారవ్వడానికి సుమారు 90 రోజుల సమయం పడుతుంది. అంటే మీరు కేవలం మూడు నెలల పాటు క్రమశిక్షణతో కూడిన ఆహారం, లైఫ్ స్టైల్ పాటిస్తే, ఎటువంటి ఖరీదైన ట్రీట్మెంట్ లేకుండానే అద్భుతమైన ఫలితాలు పొందవచ్చు. సిగరెట్, ఆల్కహాల్ను పక్కన పెట్టి.. రోజూ ఆకుకూరలు, మొలకెత్తిన గింజలు, గుడ్లు, జింక్ ఎక్కువగా ఉండే బాదం, వాల్నట్స్ వంటివి తీసుకోవడం మొదలుపెట్టండి. రోజుకు 30 నిమిషాల వ్యాయామం మీ శరీరంలోని టాక్సిన్స్ను బయటకు పంపి, కణాల నాణ్యతను పెంచుతుంది.
చాలా జంటలు చేస్తున్న అతిపెద్ద పొరపాటు ఏమిటంటే.. కేవలం ‘పిల్లల కోసమే’ శృంగారం చేయడం. ఒక మెకానికల్ పద్ధతిలో, ఒత్తిడితో కూడిన కలయిక వల్ల శరీరంలో స్ట్రెస్ హార్మోన్లు పెరిగి సంతానోత్పత్తికి ఆటంకం కలిగిస్తాయి. పిల్లల కోసం కాకుండా, దంపతుల మధ్య ప్రేమానురాగాలు పెరగడానికి, మానసిక ప్రశాంతత కోసం కలిసినప్పుడు మాత్రమే శరీరంలో సానుకూల హార్మోన్లు విడుదలవుతాయి. ఇది గర్భం దాల్చడానికి ఎంతో సహకరిస్తుంది. గుర్తుంచుకోండి, సంతానలేమి అనేది భయపడాల్సిన జబ్బు కాదు.. అది మనం సరిదిద్దుకోవాల్సిన ఒక జీవనశైలి లోపం మాత్రమే!
ఈ మూడు నెలల కాలంలో దంపతులు పిల్లల కోసం అనే ఒత్తిడి లేకుండా, కేవలం ఒకరిపై ఒకరికి ఉన్న ప్రేమతో కలిసుండాలి. శృంగారం అనేది ఒక బాధ్యతలా కాకుండా, ఆనందాన్నిచ్చే ప్రక్రియగా మారినప్పుడే శరీరంలో సానుకూల హార్మోన్లు విడుదలై సంతాన ప్రాప్తికి మార్గం సుగమం అవుతుంది. లక్షలు ఖర్చు చేసే ముందు, మీ శరీరంపై మీకు నమ్మకం ఉంచి ఈ మార్పులు చేసి చూడండి.
