Kerala Girl : కేరళకు చెందిన 14 ఏళ్ల బాలిక శ్రీనంద మృతితో చిక్కమగళూరు విహారయాత్ర విషాదాంతమైంది. మూడు రోజుల క్రితం అదృశ్యమైన ఆమె మృతదేహం సుమారు 1500 అడుగుల లోతున్న లోయలో లభ్యమైంది.
కేరళ నుంచి సుమారు 40 మంది సభ్యులతో కూడిన ఒక పెద్ద కుటుంబం వేసవి సెలవుల కోసం కర్ణాటకలోని చిక్కమగళూరుకు వచ్చింది. ఏప్రిల్ 7వ తేదీన వీరంతా దత్త పీఠం సమీపంలోని ప్రసిద్ధ మాణిక్యధార జలపాతాన్ని సందర్శించారు. సాయంత్రం 5:30 గంటల సమయంలో కుటుంబ సభ్యులందరూ కలిసి మెట్లు దిగుతుండగా, అందరి వెనకాలే నడుస్తున్న శ్రీనంద ఒక్క క్షణంలో కనిపించకుండా పోయింది. దట్టమైన అడవి ప్రాంతం కావడంతో కుటుంబ సభ్యులు ఎంత వెతికినా ఆమె జాడ దొరకలేదు.
బాలిక అదృశ్యం కావడంతో పోలీసులు, అటవీ శాఖ, అగ్నిమాపక దళం, ఎస్.డి.ఆర్.ఎఫ్ (SDRF) రంగంలోకి దిగాయి. సుమారు 60 మంది సిబ్బంది ఐదు బృందాలుగా విడిపోయి గాలింపు చర్యలు చేపట్టారు. అటవీ శాఖ మంత్రి ఈశ్వర్ ఖండ్రే ఆదేశాల మేరకు థర్మల్ కెమెరా డ్రోన్లను కూడా రంగంలోకి దించారు. చివరకు మూడు రోజుల తర్వాత, ఆమె అదృశ్యమైన చోటుకు సుమారు 5 కిలోమీటర్ల దూరంలోని అరిశినగుప్పె ప్రాంతంలో ఒక లోతైన లోయలో శ్రీనంద మృతదేహాన్ని గుర్తించారు.
ఆ లోయ సుమారు 1500 అడుగుల లోతు ఉండటంతో మృతదేహాన్ని బయటకు తీయడం రెస్క్యూ టీమ్కు పెద్ద సవాలుగా మారింది. ఎంతో కష్టపడి ఆమెను వెలికితీశారు. ప్రాథమికంగా ఇది ఆత్మహత్య కావచ్చని పోలీసులు అనుమానిస్తున్నప్పటికీ, నడుస్తూ ప్రమాదవశాత్తు కాలు జారి లోయలో పడిపోయి ఉండవచ్చని కుటుంబ సభ్యులు భావిస్తున్నారు. వన్యప్రాణుల దాడి ఏమైనా జరిగిందా అనే కోణంలో కూడా విచారణ సాగుతోంది.
శ్రీనంద మరణానికి గల అసలు కారణం పోస్టుమార్టం నివేదిక వచ్చిన తర్వాతే తెలుస్తుందని పోలీసులు తెలిపారు. అప్పటివరకు సంతోషంగా గడిపిన కుటుంబంలో ఈ ఘటన తీరని శోకాన్ని నింపింది. విహారయాత్రకు వచ్చి ఇలా ప్రాణాలు కోల్పోవడం అందరినీ కలచివేస్తోంది.
