BIG BREAKING : తమిళనాడు రాజకీయాల్లో సంచలనం రేపుతూ, నటుడు విజయ్ నేతృత్వంలోని తమిళగ వెట్రి కళగం (TVK) పార్టీ అధికార పీఠం దిశగా అడుగులు వేస్తోంది. ఇటీవల జరిగిన అసెంబ్లీ ఎన్నికల్లో మొత్తం 234 స్థానాలకు గాను టీవీకే ఏకంగా 108 నియోజకవర్గాల్లో విజయం సాధించి అతిపెద్ద పార్టీగా అవతరించింది. విజయ్ స్వయంగా పెరంబూర్, తిరుచ్చి ఈస్ట్ స్థానాల నుండి పోటీ చేసి ఘనవిజయం సాధించారు.
మెజారిటీకి కేవలం 10 సీట్ల దూరంలో నిలిచినప్పటికీ, ప్రభుత్వాన్ని ఏర్పాటు చేసే అవకాశం తమకే ఇవ్వాలని విజయ్ గట్టిగా కోరుతున్నారు. ఈ మేరకు విజయ్ తమిళనాడు గవర్నర్ రాజేంద్ర అర్లేకర్కు ఈమెయిల్ ద్వారా ఒక లేఖ పంపారు. తమ పార్టీకి అత్యధిక స్థానాలు వచ్చాయని, అందువల్ల ప్రభుత్వాన్ని ఏర్పాటు చేసేందుకు తమను ఆహ్వానించాలని ఆయన గవర్నర్ను కోరారు.
Vijay writes to TN Governor, seeks invite to form Govt, promises to prove majority in 2 weeks
TVK, which won 108 Assembly constituencies, has staked claim to power
Vijay has written to Governor Rajendra Arlekar asking for an invite to take oath. Sources suggest the… pic.twitter.com/U5ddtjb59r
— Nabila Jamal (@nabilajamal_) May 5, 2026
ఒకవేళ అవకాశం ఇస్తే, అసెంబ్లీలో రెండు వారాల గడువులోగా తాము మెజారిటీని నిరూపించుకుంటామని విజయ్ ఆ లేఖలో హామీ ఇచ్చారు. ప్రస్తుతం ఈ పరిణామం తమిళ రాజకీయాల్లో హాట్ టాపిక్గా మారింది.
మరోవైపు, ప్రస్తుత ముఖ్యమంత్రి ఎం.కె. స్టాలిన్ తన కోలాత్తూరు నియోజకవర్గం నుండి ఓటమి పాలవ్వడం అందరినీ ఆశ్చర్యపరిచింది. ఫలితాల అనంతరం ఆయన తన పదవికి రాజీనామా చేశారు. ప్రస్తుతం రాష్ట్రంలో ఏ పార్టీకీ స్పష్టమైన మెజారిటీ లేకపోవడంతో హంగ్ ఏర్పడింది. అయితే, డిఎంకె కూటమిలోని కొన్ని చిన్న పార్టీలు, కాంగ్రెస్ విజయ్కు మద్దతు ఇచ్చే అవకాశం ఉందనే ఊహాగానాలు వినిపిస్తున్నాయి. గవర్నర్ నిర్ణయంపైనే ఇప్పుడు అందరి దృష్టి నెలకొంది.
