Monalisa : కుంభమేళా వీడియోతో వైరల్ అయిన మొనాలిసా భోసలే ఇచ్చిన ఫిర్యాదుతో ఒక సినిమా దర్శకుడిపై పోక్సో కేసు నమోదైంది. కేరళలోని ఎర్నాకులం సెంట్రల్ పోలీసులు ఈ కేసును నమోదు చేశారు. దర్శకుడు సనోజ్ మిశ్రా, వీహెచ్పీ నాయకుడు అనిల్ విలయిల్ సహా మొత్తం నలుగురిపై ఆమె ఆరోపణలు చేశారు. తాను చిన్న వయసులో ఉన్నప్పటి నుంచే వీరు తనను ఇబ్బంది పెడుతున్నారని మొనాలిసా పోలీసులకు వివరించారు.
కుంభమేళా వీడియో వల్ల తనకు మంచి పేరు రావడంతో, అది చూసిన దర్శకుడు సినిమాలో అవకాశం ఇస్తానని చెప్పి తనను మోసం చేశాడని ఆమె ఆవేదన వ్యక్తం చేశారు. కొచ్చిలో జరిగిన ఒక ప్రెస్ మీట్లో మొనాలిసా మాట్లాడుతూ, ఆ దర్శకుడు తనను పదిసార్లు అసభ్యకరంగా తాకాడని సంచలన వ్యాఖ్యలు చేశారు. ఈ విషయం గురించి తన ఇంట్లో వాళ్లకు చెప్పినా వారు తనకు అండగా నిలబడలేదని ఆమె బాధపడ్డారు.
ఈ సంఘటనలు కేరళ బయట జరగడం వల్ల, పోలీసులు ఈ కేసును మధ్యప్రదేశ్ పోలీసులకు అప్పగించనున్నారు. ఇప్పటికే మొనాలిసా మేజిస్ట్రేట్ ముందు తన వాంగ్మూలాన్ని ఇచ్చారు. ప్రస్తుతం ఈ కేసు దర్యాప్తు జరుగుతోంది.
అయితే, ఈ వ్యవహారంలో మొనాలిసా వయసుపై చిన్న వివాదం నడుస్తోంది. ఆమె తల్లిదండ్రులు మొనాలిసా వయసు 16 ఏళ్లే అని చెబుతుంటే, ఆమె మాత్రం తనకు 18 ఏళ్లు అని అంటున్నారు. ఈ క్రమంలో ఆమె భర్త ఫర్మాన్పై కూడా మధ్యప్రదేశ్లో కేసు నమోదైంది. ఈ వయసు గొడవ వల్ల కేసు మరింత చిక్కుల్లో పడింది.
